Launagreiðendur

Launagreiðendur

Launagreiðendur greiða skyldusparnað mánaðarlega í lífeyrissjóð fyrir alla starfandi einstaklinga á aldrinum 16-70 ára og viðbótarsparnað fyrir þá sem gera samning um hann. Launagreiðendur eru hvattir til að senda Frjálsa skilagreinar með rafrænum hætti í gegnum launakerfi eða launagreiðendavef Frjálsa, sjá nánar hér að neðan.

Sjálfstætt starfandi

Sjálfstætt starfandi eða sjálfstæðir atvinnurekendur greiða líka skyldusparnað í lífeyrissjóð og viðbótarsparnað óski þeir þess. 

Að lágmarki greiða þeir 15,5% af launum eða reiknuðu endurgjaldi í lífeyrissjóð en er þó frjálst að greiða meira og auka þannig við lífeyrisréttindi og séreign. Þeir mega velja sér lífeyrissjóð og því mikilvægt að kynna sér mismunandi uppbyggingu sjóða og réttindaávinnslu. Hjá Frjálsa fer stór hluti skylduiðgjalds í séreign sem er erfanleg og eykur sveigjanleika við útgreiðslur.

Vakin er athygli á viðtali við Arnald Loftsson, framkvæmdastjóra Frjálsa lífeyrissjóðsins - Einyrkjar hafa meira frelsi en launafólk.

  • Sjálfstætt starfandi og sjálfstæðir atvinnurekendur með fastar mánaðarlegar greiðslur geta nýtt sér kröfuáskrift en þó er mælt með notkun launagreiðendavefs
  • Óþarfi að senda inn skilagreinar
  • Krafa myndast sjálfkrafa í netbanka launagreiðanda
  • Mikilvægt að upplýsa Frjálsa um breytingar á launum/reiknuðu endurgjaldi

Launagreiðendaþjónusta

Greiðsluupplýsingar

  • Notandanafn og lykilorð: Launagreiðandi velur sjálfur í launakerfi 
  • Kennitala: 600978-0129
  • Reikningsnúmer: 329-26-7056
  • Skylduiðgjald: Lífeyrissjóðsnúmer 137
  • Viðbótariðgjald: Lífeyrissjóðsnúmer 135
  • IBAN: IS62 0329 2600 7056 6009 7801 29
  • SWIFT: ESJAISRE
  • Gjalddagi: 10. dagur næsta mánaðar eftir launatímabil
  • Eindagi: Síðasti virki dagur næsta mánaðar eftir launatímabil

Launakerfi

  • Launagreiðandi velur sjálfur notandanafn og lykilorð, sjóðurinn kemur ekki að úthlutun þeirra 
  • Krafa myndast sjálfkrafa í netbanka launagreiðanda
  • Vefslóð til að skrá í launakerfi (XML gögn): https://www.arionbanki.is/rafskilxml/sendpaymentinfo.aspx
  • Nánar um rafrænar skilagreinar frá launakerfum

Launagreiðendavefur

  • Skilvirkasta og þægilegasta leiðin fyrir fyrirtæki sem hafa ekki aðgang að launakerfi sem styður rafrænar skilagreinar
  • Býður upp á nýskráningu skilagreina, afritun eldri skilagreina og innsendingu textaskráa
  • Krafa myndast sjálfkrafa í netbanka launagreiðanda
  • Launagreiðendur geta sjálfir sótt yfirlit yfir iðgjaldaskil - launagreiðendayfirlit
  • Skoða notkunarleiðbeiningar launagreiðendavefs

Opna launagreiðendavef

*Innskráningarþjónustu og umboðskerfi Ísland.is hefur verið lokað. Nú hefur nýtt umboðs- og innskráningarkerfi verið tekið í notkun, Signet Login. Núverandi umboð flytjast ekki yfir í nýja kerfið.Til að geta skráð sig inn á launagreiðendavefinn er nauðsynlegt að veita umboð að nýju. Prókúruhafar þurfa að veita sjálfum sér og öðrum starfsmönnum sem sjá um iðgjaldaskil umboð í gegnum nýtt umboðskerfi.

Spurt og svarað

Hvað er skylduiðgjald (lágmarksiðgjald) í lífeyrissjóð hátt?

Greiða skal í lífeyrissjóð fyrir alla starfandi einstaklinga á aldrinum 16-70 ára. Þann 1. janúar 2023 hækkaði skylduiðgjald (lágmarksiðgjald) í lífeyrissjóð, lögum samkvæmt, úr 12% af launum í 15,5%. Framlag launagreiðanda er 11,5% og framlag launþega 4%. Sjálfstæðir atvinnurekendur greiða hvort tveggja. Dæmi eru um að launþegar semji um hærra mótframlag frá launagreiðanda. Sjá undantekningar frá iðgjaldsstofni í 3. gr. laga nr. 129/1997. Samhliða lífeyrisiðgjöldum greiða launagreiðendur 0,10% í VIRK starfsendurhæfingarsjóð.

Launþegi og launagreiðandi semja stundum um hærra mótframlag, sjá; Einyrkjar hafa meira frelsi en launafólk.

Hvað er iðgald í viðbótarlífeyrissparnað hátt?

Til viðbótar við skyldulífeyrissparnað geta launþegar lagt fyrir allt að 4% af launum í viðbótarlífeyrissparnað og fá 2% mótframlag frá launagreiðanda samkvæmt flestum kjarasamningum. Sjálfstæðir atvinnurekendur greiða hvort tveggja og er heildarframlag þeirra því almennt 6%. Launþegi og launagreiðandi semja stundum um hærra mótframlag, sjá Má launagreiðandi greiða hærra en hefðbundið mótframlag? Loks er vakin er athygli á greininni Einyrkjar hafa meira frelsi en launafólk.

Af hvaða tekjum er greitt?

Iðgjald er greitt af öllum launatekjum, að frátöldum ákv. hlunnindum, nánar í 3. gr. laga nr. 129/1997. Greiða skal í skyldulífeyrissparnað í lífeyrissjóð af atvinnuleysisbótum og fæðingarorlofsgreiðslum. Það er hins vegar val launþega hvort hann greiðir viðbótarlífeyrissparnað, hægt er að taka tímabundið hlé. Vinnumálastofnun og Fæðingarorlofssjóður greiða ekki mótframlag í viðbótarlífeyrissparnað

Hvenær eru gjalddagi og eindagi?

Gjalddagi er 10. dagur næsta mánaðar eftir launatímabili og eindagi síðasti dagur næsta mánaðar eftir launatímabili. Sem dæmi þá er gjalddagi vegna marsmánaðar 10. apríl og eindagi 30. apríl. Dráttarvextir reiknast frá gjalddaga ef greitt er eftir eindaga.

Af hverju þarf að skila inn skilagrein?

Skilagrein þarf að fylgja greiðslu í lífeyrissjóð svo að ljóst sé hvernig bóka eigi greiðsluna þ.e. hve mikið er greitt fyrir hvern launþega og fyrir hvaða tímabil. Iðgjöld bera vexti frá og með þeim degi sem skilagrein berst, því er mikilvægt að skilagrein berist frá launagreiðanda samhliða greiðslu. Þegar um fastar mánaðarlegar greiðslur er að ræða, t.d. kröfuáskrift, þarf ekki að skila skilagrein.

Hafa flestir val um lífeyrissjóð eða kveða kjarasamningar á um skylduaðild?

Frjálsi lífeyrissjóðurinn er öllum opinn, svo framarlega sem kjarasamningur eða ráðningarsamningur sem launþegi er aðili að kveður ekki á um annað. Það er ekki skylduaðild að Frjálsa lífeyrissjóðnum. Sjálfstæðir atvinnurekendur hafa jafnan frjálst val um lífeyrissjóð og geta því greitt í Frjálsa lífeyrissjóðinn. Sama má segja um fjölmarga launþega. Frjálsi lífeyrissjóðurinn er einnig opinn þeim sem vilja leggja fyrir í viðbótarlífeyrissparnað, en allir hafa frjálst val um hvort og í hvaða sjóð þeir greiða viðbótarlífeyrissparnað. Kjarasamningar kveða hins vegar oft á um skylduaðild að lífeyrissjóði. Launagreiðendum er bent á að hafa samband við samtök vinnuveitenda eða stéttarfélög, til að fá upplýsingar um gildandi kjarasamninga launþega sinna, en í þeim ætti að koma fram hvort skylduaðild sé að ákveðnum lífeyrissjóði. Einnig geta verið sérstök ákvæði um aðild að lífeyrissjóðum í sumum ráðningarsamningum, þá hafa launagreiðandi og launþegi yfirleitt vitneskju um það.

Hvernig er iðgjald greitt og skilagreinum skilað?

Hægt er að velja um nokkrar leiðir til að greiða iðgjald og skila skilagreinum, sjá upplýsingar um skilagreinar og greiðslur. Sjálfstæðir atvinnurekendur eru hvattir til að vera með fastar mánaðarlegar greiðslur í formi kröfuáskriftar í netbanka sem er mjög skilvirk og þægileg leið. Skilagreinar eru óþarfar þar sem upplýst er um fastar mánaðarlegar greiðslur fram í tímann. Nánar um skilagreinar.

Hvernig er greiðslum tekjuskatts háttað?

Það er ekki greiddur tekjuskattur af iðgjaldi við greiðslu í lífeyrissjóð, iðgjaldið er frádráttarbært frá skatti, svo að greiðslu tekjuskatts er frestað þar til kemur að útgreiðslu. Á bæði við um skyldulífeyrissparnað og viðbótarlífeyrissparnað.

Hvaða greiðslumáta er mælt með fyrir sjálfstæða atvinnurekendur?

Sjálfstæðir atvinnurekendur eru hvattir til að vera með fastar mánaðarlegar greiðslur í formi kröfuáskriftar í netbanka sem er mjög skilvirk og þægileg leið. Skilagreinar eru óþarfar þar sem upplýst er um fastar mánaðarlegar greiðslur fram í tímann.

Hvar fást notendanafn og lykilorð vegna rafrænna skila í launakerfi?

Þú velur þér sjálfur notandanafn og lykilorð ef launakerfið biður um það, sjóðurinn úthlutar því ekki.

Hvernig er mótframlagi sjálfstæðra atvinnurekenda háttað?

Sjálfstæðir atvinnurekendur geta lagt fyrir allt að 4% af reiknuðu endurgjaldi í viðbótarlífeyrissparnað og dregið frá skattskyldum tekjum líkt og launþegar. Til viðbótar geta þeir greitt sér mótframlag sem gjaldfærist í rekstri og myndar stofn til tryggingargjalds. Sjálfstæðir atvinnurekendur nýta sér gjarna heimild til greiðslu hærra mótframlags, sjá Má launagreiðandi greiða hærra en hefðbundið mótframlag? Loks er vakin er athygli á greininni Einyrkjar hafa meira frelsi en launafólk.

Á að segja skyldulífeyrissparnaði upp skriflega?

Það er ekki skylda að segja skyldulífeyrissparnaði upp skriflega, en verður þó að teljast góð regla. Sendu tölvupóst á lifeyristhjonusta@arionbanki.is til að upplýsa lífeyrissjóðinn um að greiðslur hætti, til að koma í veg fyrir innheimtuaðgerðir að ástæðulausu.

Á að segja viðbótarlífeyrissparnaði upp skriflega?

Já. Uppsagnarfrestur er 2 mánuðir. Sendu tölvupóst á lifeyristhjonusta@arionbanki.is til að fá sent uppsagnareyðublað.

Á að bíða eftir staðfestingu vörsluaðila áður en greiðslur hefjast í nýjan sjóð?

Þrátt fyrir að nýr samningur um viðbótarlífeyrissparnað ásamt uppsögn á samningi fyrri vörsluaðila hafi borist launagreiðanda, geta greiðslur í nýjan sjóð ekki hafist fyrr en fyrir liggur staðfest uppsögn frá fyrri vörsluaðila um að hann gefi frá sér samning, eða 2ja mánaða uppsagnarfrestur er liðinn.

Hvað gerist ef skilagrein berst sjóðnum en engin greiðsla?

Þegar skilagrein berst sjóðnum en engin greiðsla, þá er greiðanda sent greiðsluáskorunarbréf sem veitir 15 daga greiðslufrest á ógreidda skilagrein eftir eindaga. Krafa er mynduð ef hún er ekki þegar til staðar. Ef skilagrein er enn ógreidd 15 dögum eftir að greiðsluáskorun er send þá er hún send til frekari innheimtu til Motus.

Hvað gerist ef greiðsla berst of seint?

Berist greiðsla of seint eru dráttarvextir reiknaðir frá gjalddaga til greiðsludags. Innborgun er tekin upp í. Á eftirstöðvar er stofnuð krafa og greiðsluáskorunarbréf er sent til greiðanda.

Hvað ef ég greiði aðeins hluta skylduiðgjalda í lífeyrissjóð fyrir launþega mína?

Hafi launagreiðandi aðeins greitt hluta af skylduiðgjöldum í lífeyrissjóð fyrir launþega síðasta iðgjaldaár, þá fær hann senda kröfu frá lífeyrissjóði að beiðni RSK, haustið á eftir.

Hvað ef ég greiði ekki í lífeyrissjóð fyrir launþega mína?

Hafi launagreiðandi ekki greitt nein skylduiðgjöld í lífeyrissjóð fyrir launþega síðasta iðgjaldaár, þá fær launagreiðandi senda kröfu frá lífeyrissjóði að beiðni RSK, haustið á eftir. Hafi engin iðgjöld vegna tekjuársins verið greidd og sjóðfélagi auk þess ekki skráð lífeyrissjóð á skattframtal sitt, þá sendir SL lífeyrissjóður að öllum líkindum kröfuna. Launagreiðandi getur óskað eftir að greiða kröfuna til Frjálsa lífeyrissjóðsins ef launþegi er ekki skyldugur samkvæmt kjarasamningi að greiða í ákveðinn sjóð. Óskað er eftir yfirtöku með því að senda tölvupóst á launagreidendur@arionbanki.is. Frestur til að óska eftir yfirtöku er almennt mánuður frá fyrsta bréfi.

Innheimta RSK og SL lífeyrissjóðs

Lífeyrissjóðum ber að innheimta vangoldin iðgjöld vegna sjóðfélaga sinna á grundvelli upplýsinga sem ríkisskattstjóri sendir ár hvert til lífeyrissjóðanna. Hafi hluti iðgjalda tekjuárs verið greiddur í lífeyrissjóð eða sérstaklega merkt við ákveðinn sjóð á skattframtali þá sér viðkomandi lífeyrissjóður um innheimtuna. Hafi engin iðgjöld vegna tekjuársins verið greidd og sjóðfélagi ekki skráð lífeyrissjóð á skattframtal sitt, þá sér SL lífeyrissjóður að öllum líkindum um innheimtuna.  

ATH. hægt er að óska eftir því að Frjálsi yfirtaki kröfur frá SL lífeyrissjóði með því að senda tölvupóst á launagreidendur@frjalsi.is ásamt afriti af yfirliti/greiðsluseðli frá SL lífeyrissjóði innan uppgefins frests SL lífeyrissjóðs.