Frjálsi fjárfestingarbankinn hf.
Starfsemi Frjálsa fjárfestingarbankans felst aðallega í þjónustu við viðskiptavini, þótt ekki séu veitt ný lán, ásamt þjónustu við lánasöfn, innheimtustarfsemi, umsýslu leigufélaga og umsjón ýmissa byggingarverkefna. Starfsemi bankans varð 27 ára á þessu ári en hann hefur verið í eigu SPRON frá því í lok árs 2002. Við fall SPRON lokaðist fyrir stuðning móðurfélagsins við fjármögnun Frjálsa fjárfestingarbankans. Þegar fyrirséð var að greiðsluörðugleikar bankans liðu ekki hjá á skömmum tíma var óskað eftir slitum á honum í samræmi við 3. tl. 1. mgr. 101. gr. laga nr. 161/2002 um fjármálafyrirtæki. Í framhaldi af því var slitastjórn skipuð.
Frjálsi fjárfestingabankinn hf. (áður Samvinnusjóður Íslands hf.) var stofnaður þann 18. nóvember árið 1982 á 100 ára afmæli Samvinnuhreyfingarinnar. Tilgangur félagsins við stofnun var að efla íslenskt efnahagslíf með því að beita sér fyrir þáttöku samvinnuhreyfingarinnar í atvinnulífi landsmanna, einkum í nýjum greinum. Við stofnun varð því félagið fyrsta framtaksfyrirtæki ?Venture capital? á Íslandi en tilgangur félagsins hefur breyst í áranna rás.
Stofnendur félagsins voru starfandi kaupfélög og önnur lögleg samvinnufélög. Meðal stofnenda voru Olíufélagið hf., Samvinnutryggingar g.t., Reginn hf. og Lífeyrissjóður SÍS.
Starfsemi félagsins var í fyrstu einskoruð við kaup á skuldabréfum á markaði, lánveitingum og ábyrgðum til eigenda og kaupum á hlutabréfum í nýjum hlutafélögum með vaxtamöguleika. Meðal fyrstu félaga sem félagið stóð að stofnun var Marel hf. og Þróunarfélagið hf.
Framkvæmdastjórar Frjálsa fjárfestingarbankans hf. frá upphafi eru:
1982-1984 Þorsteinn Ólafsson starfandi stjórnarformaður
1984-1987 Þórður Yngvi Guðmundsson
1987-1988 Þorsteinn Ólafsson
1988-1998 Arnór Arnórsson
1998-1999 Kristinn Bjarnason (settur framkvæmdastjóri)
1999-2001 Örn Gústafsson
2001-2009 Kristinn Bjarnason
2009- Ingólfur Friðjónsson
Á árinu 1984 varð félagið fyrsta fyrirtæki á Íslandi að bjóða skuldabréf til sölu til almennings á almennum markaði en bréfin voru seld fyrir milligöngu Kaupþings hf .
Á árinu 1986 endurvakti félagið eignaleigu hér á landi eftir margra ára stöðnun sem leiddi síðar til stofnunar eignaleigufyrirtækisins Lindar hf. en stofnendur voru ásamt Frjálsa fjárfestingarbankanum, Samvinnubankinn og franski bankinn Banque Indosuez. Lind hf. var selt til Landsbanka Íslands árið 1992 en árið áður hafði Landsbankinn eignast hlut annarra stofnenda.
Árið 1995 markar tímamót í sögu Frjálsi fjárfestingarbankinn hf. en þá hóf félagið að starfa samkvæmt lögum nr. 123/1993 um lánastofnanir aðrar en viðskiptabanka og sparisjóði. Samkvæmt lögunum hefur félagið heimild að kalla sig fjárfestingarbanka en félagið hefur sömu heimildir og viðskiptabankar og sparisjóðir að því undanskyldu að fjárfestingarbanka er óheimilt er að taka við innlánum frá almenningi til ávöxtunar.
Á árinu 1997 var félagið skráð áVerðbréfaþing Íslands að undanförnu hlutabréfaúboði sem Kaupþing hf. annaðist. Útboðið gekk vel og seldar voru 200 milljónir króna að nafnverði á genginu 2,5. Heildarfjöldi hluthafa varð rúmlega 300 eftir hlutafjáraukninguna.
Árið 2000 var tími mikilla breytinga hjá Frjálsa fjárfestingarbankanum. Í tæplega 20 ára sögu hafði félagið verið rekið með megináherslu á útlán ásamt fjárfestingum í hlutabréfum. Eitt þeirra markmiða sem lagt var upp með í byrjun árs 2000 var að nýta betur heimildir bankans sem fjárfestingarbanka og færa út starfssvið hans. Í janúarmánuði var samþykkt að ganga til samningarviðræðna við verðbréfafyrirtækið Fjárvang hf. Aðalstarfsemi Fjárvangs voru verðbréfaviðskipti og eignastýring en þessi starfsemi var vel samræmanleg fyrirhugaðri útvíkkun á starfsemi bankans. Í maí mánuði var samruninn samþykktur á hluthafafundum félaganna.
Undir lok ársins 2000 keypti Kaupþing hf. ásamt samstarfsfélögum um 70% hlutabréfa í félaginu. Ný stjórn félagsins tók ákvörðun um að breyta starfsemi félagsins. Verðbréfaviðskiptasvið og eignastýringarsvið var selt til Kaupþings hf. en útlánastarfsemi félagsins var aukin. Í kjölfar gerði Kaupþing hf. yfirtökutilboð til annarra hluthafa sem mikill meirihluti tók. Við yfirtöku Kaupþings hf. uppfyllti félagið ekki lengur skilyrði um lágmarks hluthafafjölda til að vera skráð á Verðbréfaþing Íslands og voru hlutabréf félagsins afskráð í kjölfar yfirtökunar.
30. september 2002 keypti Sparisjóður Reykjavíkur og nágrennis allt hlutafé í bankanum af Kaupþingi hf. Eignabreytingin hefur enginn áhrif á rekstur bankans en kjarnastarfsemi félagsins í dag eru en félagið lánar gegn veði í fasteignum og einkabílum til einstaklinga og fyrirtækja, framkvæmdalán til bygginga á fasteignum og kaupir kröfur, þá aðallega raðgreiðslusamninga af fyrirtækjum. Þá hefur Frjálsi fjárfestingarbankinn hf. lagt aukna áherslu á stærri lánveitingar til fjársterkra millistórra og stærri fyrirtækja.